Igo
  • 2021/07/30

Plazakoetxen kalistenia parkea jartzeko lanak hasiko ditu hurrengo astean Galdakaoko Udalak


150 metro koadro inguru izango dituen kalistenia parkea eraikitzeko lanak hasiko ditu Galdakaoko Udalak hurrengo astean. Parkea Plazakoetxen egongo da, babeslekuaren ondoan.

Calistenia Street Workout deritzon entrenamendu sistema norberaren pisuan oinarritutako ariketa fisikoek osatzen dute, karga gehigarririk sartu gabe. Aire zabaleko ekipamendu honen bitartez, hainbat gaitasun landu eta hobetu ahal izango dira, hala nola, koordinazioa, oreka, indarra, trebetasuna, arintasuna, malgutasuna, potentzia eta erresistentzia muskularra. Kirol diziplina hau oso ezaguna egiten ari da fitnessaren munduan.

Kirol instalazio hau 140 zentimetrotik gorako garaiera duten gazte eta helduentzat gomendatuta dago eta hainbat entrenamendu mota egiteko 13 gune izango ditu, erabiltzaileei askotariko ariketak egiteko funtsezko elementuak eskainiz: handstand, push ups, squats, dips, l sit, lever, flag, leg raises, pull ups, abs, open pull ups, rope climb.

Abuztuko lehen aste honetan hasiko dira azpiegitura egiteko lanak, hondeaketarekin eta kalistenia parkearen oinarri izango den zolataren eraikuntzarekin. Hilaren amaierarako zirkuituaren instalazioa eta lurzoruaren zoladura amaituta izatea espero da. Ezustekorik ez badago, aurreikusten da instalazioa erabilgarri egongo dela hilabete eta erdi inguruko epean, irailaren lehen eta bigarren asteen artean.

Udalak Gobernu Planaren 27. puntua beteko du horrela.